അദ്ദിക്ർ

ഈ സൂക്തം 4: 136 ന്‍റെ ആശയത്തിന് സമാനവും 4: 137-138 സൂക്തങ്ങളില്‍ പറഞ്ഞ കപടവിശ്വാസികളുടെ സ്വഭാവത്തിന് നേരെ വിരുദ്ധവുമാണ്. അല്ലാഹുവിന്‍റെ സമ്മതപത്രമായ അദ്ദിക്ര്‍ കൊണ്ട് വിശ്വാസിയാവുകയും വിശ്വാസം രൂപപ്പെടുത്താനുള്ള അല്ലാഹുവിന്‍റെ സന്ദേശമായ അത് ലോകര്‍ക്ക് എത്തിച്ചുകൊടുത്തുകൊണ്ട് നിഷ്പക്ഷവാനായ നാഥനെ സഹായിച്ചുകൊണ്ടിരിക്കുകയുമാണെങ്കില്‍ അത്തരം സൂക്ഷ്മാലുക്കള്‍ മുമ്പ് അറിവില്ലാത്ത കാലത്ത് പൈശാചിക മാര്‍ഗ്ഗത്തിലൂടെ നേടിയ വിഭവങ്ങള്‍ ഭക്ഷിച്ചതിന്‍റെ പേരില്‍ അല്ലാഹു പിടികൂടുകയില്ലെന്നാണ് സൂക്തം പറയുന്നത്. സൂക്ഷ്മത എന്ന് പറഞ്ഞാല്‍ തെറ്റോ ശരിയോ എന്ന് സംശയമുള്ള ഒരു പ്രവൃത്തി തെറ്റാണെങ്കില്‍ വിധിദിവസം തിരുത്താന്‍ സാധിക്കുകയില്ലല്ലോ എന്ന ഭയത്തോടുകൂടി ആ പ്രവൃത്തി ചെയ്യാതിരിക്കലും അതുപോലെ ശരിയാണെന്ന് ഉറപ്പുള്ള ഒരു പ്രവൃത്തി മനുഷ്യരെല്ലാം എതിര്‍ക്കും, തല തന്നെ പോകുമെങ്കിലും അല്ലാഹുവിന്‍റെ തൃപ്തി കാംക്ഷിച്ചുകൊണ്ട് അത് പ്രവര്‍ത്തിക്കലുമാണ്. 'വിശ്വാസികളാവുകയും പിന്നെ സൂക്ഷ്മതയുള്ളവരാവുകയും ഏറ്റവും നല്ലതായ അദ്ദിക്റിന്‍റെ വഴിയില്‍ ചരിക്കുകയുമാണെങ്കില്‍' എന്ന് പറഞ്ഞതുകൊണ്ടുള്ള വിവക്ഷ അദ്ദിക്ര്‍ പിന്‍പറ്റുകയും മറ്റുള്ളവരുടെ വിശ്വാസം രൂപപ്പെടുത്തുക, തിന്മകള്‍ മായ്ച്ചുകളയുക, അവരെ സൂക്ഷ്മതയുള്ളവരാക്കുക, പ്രപഞ്ചത്തിന്‍റെ ആയുസ്സ് നീട്ടുക തുടങ്ങിയ ലക്ഷ്യം വെച്ചുകൊണ്ട് പരിചയും മുഹൈമിനുമായ അത് ലോകര്‍ക്ക് എത്തിച്ചുകൊടുക്കുന്ന പ്രവര്‍ത്തനങ്ങളില്‍ മുഴുകുകയുമാണെങ്കില്‍ എന്നാണ്. അത്തരക്കാര്‍ക്ക് അവരുടെ തിന്മകള്‍ നന്മകളായി പരിവര്‍ത്തിപ്പിച്ച് കൊടുക്കുന്നതാണെന്ന് 25: 68-70 സൂക്തങ്ങളില്‍ വിവരിച്ചിട്ടുണ്ട്. 2: 2; 3: 136; 4: 146, 174-175; 12: 22 വിശദീകരണം നോക്കുക.